Səyyah.az turizm və təhsil portalı xəbər verir ki, xaricdetehsil.news saytı dünyanın müxtəlif ölkələrində təhsil alan azərbaycanlı tələbələrdən müsahibələr almaqda davam edir. Növbəti qəhrəman isə Vüqar Qədirovdur. 1986-cı ildə Bakı şəhərində anadan olan Vüqar ölkəmizdə Dövlət İqtisad Universitetinin tələbəsi olub. Hazırda o, Çində Sichuan vilayətinin Chengdu şəhərində yerləşən “Southwest Jiaotong” Universitetində “Maliyyə mühasibatlıq” ixtisası üzrə magistr təhsili alır.
Müsahibim deyir ki, xaricdə oxumağa ona görə üz tutdum ki, özümü inkişaf etdirim. Dünyanın iqtisadi cəhətdən irəlidə olan ölkəsi,Çində təhsil almağım isə bir şansdır. Düşündüm ki, onu dəyərləndirim.
“Bəlkə qalib oldun”?!
Vüqar dostu vasitəsilə hazırda təhsil aldığı universitetlə tanış olub.“Dostum Çin dövləti tərəfindən “CSC” təqaüd proqramı barədə mənə məlumat verdi. Və təklif etdi ki, sənədlərimi göndərim. Bəlkə qalib oldum” .
Bir ƏSR yaşı olan universitet…
Hazırda təhsil aldığım “Southwest Jiaotong” Universiteti Çinin Qərb hissəsində yerləşir. Sichuan vilayətinin tanınmış ali məktəblərindəndir. Bir əsrdən çox yaşı var. 3 kampusu fəaliyyət göstərir. Universitetdə 60 mindən artıq tələbə təhsil alır ki, mindən çoxunu xarici tələbə təşkil edir. Bu məkan daha çox mexaniki fakültələr, xüsusilə dəmiryolu işinin təşkili üzrə ixtisaslaşıb. Lakin, burada bütün ixtisaslar üzrə departamentlər fəaliyyət göstərir və kifayət qədər tələbə fərqli sahələr üzrə təhsil alır. Hətta tibb təhsili almaq istəyən gənclər də bura üz tuta bilirlər. Ümumiyyətlə, Çinin müxtəlif şəhərlərində azərbaycanlı tələbələr az saydadır. Mən qaldığım vilayətində iki nəfər azərbaycanlı tələbə var. Bir MƏN, bir də DOSTUM…
“Üç il vaxtım var”…
Burada magistr təhsili alıram. Üç il bizə vaxt veriblər. Dərslərimiz kredit əsasında keçirilir. Hər gün dərslərə gedirəm. Bəzi dərslərimiz isə həftədə bir dəfə olur. Əsasən seminarlarda iştirak edirsən. Ayda bir dəfə isə təqdimatlar etməlisən. Sonda ya imtahanda iştirak edirsən ya da smestr ərzində öyrəndiklərini report edirsən. Nəticədə, diplom işi müdafiə olunur və…
Vaxtın qızıla “=” olduğu tələbəlik…
Müsahibim iki ölkənin tələbələrini maraqlı şəkildə müqayisə edir. O, burada çinli tələbələrin vaxtının demək olar ki, olmadığını deyir. “Onların əyləncəsi olmur. Çox oxuyurlar və çox savadlıdırlar. Bütün günləri laboratoriyalarda keçir. Yalnız Çinlilərin yeni il bayramında, yəni yanvar–fevral aylarında evlərinə gedirlər. Burada gənclər çox savadlıdırlar. Lakin çinli tələbələrin dünyaygörüşü hər hansı bir çərçivə daxilindədir. Onlarla ünsiyyətə girmək üçün gərək onun ixtisasına dərindən bələd olasan. Əks təqdirdə söhbətiniz tutmaz. Çünki çinli tələbələrlə ünsiyyətdə olmaq, ortaq məxrəcə gəlmək çox çətindir. Ancaq onlar İXTİSASLARI ÜZRƏ ÇOX PEŞƏKARDIRLAR.
“Part time” yoxsa “free time”?
Düzünü desək, burada tələbələrin işləməyə vaxtı yoxdur. Əksər tələbələr dövlət tərəfindən təqaüd alır. Ancaq boş vaxtı olan tələbələr var ki, onlara ayrılan free time-dan istifadə edə bilirlər. Çində xarici vətəndaşların işləməyi isə çətin olur. Əgər çin dilini bilirsənsə, iş tapa bilərsən. Əgər qanuni işləmək istəyirsənsə, çalışdığın şirkət sənə müqavilə verməlidir. Ancaq bu sənədi oxuduğun universitetə təqdim etdikdən sonra “part time” kimi işləyə bilərsən. Əgər çin dilini bilmirsənsə… əvəzində ingilis dilin olmalıdır. Ən azından burada uşaqlara dərs deyə bilərsən. Lakin çinlilər diqqət edir ki, sənin ana dilin ingilis dili olsun.
Vüqar Qədimov ilk dəfə gəldiyi ölkədə maraqlı hadisələrlə qarşılaşıb. Deyir ki, “Bir gün dostumla Çində, şəhərdən kənara çıxdıq. Hansı məkana olurduqsa, bizi görənlər şəklimizi çəkirdilər. Narahat olmağa başladım. Axı bunlar bütün günü niyə şəkilimizi çəkirlər. Məndə nəsə var?! Sonradan mənə dedilər ki, onlar xarici vətəndaşlar demək olar ki, çox az görürlər. Onun üçün ya sənin çoxlu şəklini çəkirlər ya da xahiş edirlər ki, sənlə şəkil çəkdirsinlər”.
Təbliğat işləri necə gedir?
Burada müxtəlif günlərin mədəniyyət gecələri olur. Ancaq Çində azərbaycanlı tələbə demək olar ki, az saydadır. Ona görə biz çox şeylər edə bilmirik. Sadəcə bir Azərbaycanlı tələbə kimi məndə insanlar arasında ölkəmiz haqda, xüsusilə Dağlıq Qarabağ problemi barəsində çalışıram ki, məlumat verim. Həmçinin burada təhsil alan tələbələrimiz var ki, Azərbaycan həqiqətləri barədə çin dilində saytlara məlumat yerləşdirirlər.
Son…
Demək istərdim ki, çalışın mükəmməl təhsil alın. Dünya təhsil sisteminin üstünlüklərindən yararlanın. Sevdiyiniz fakültənin sirlərini daha dərindən öyrənin…Hər kəsə UĞURLAR…