Azərbaycanda "Yeni Antalya" yaradılır - YERLƏR SEÇİLİB
Cənub bölgəsində turizm rekreasiya zonalarının yaradılması üzrə lazımı işlərə başlanılıb.
Seyyah.az turizm portalı xəbər verir ki, ölkəmizdə 1-ci turizm rekreasiya zonası Şimal bölgəsində yaradılıb. Növbəti mərhələdə rekreasiya zonası Cənub bölgəsində yaradılacaq. Artıq bununla bağlı mərkəz də seçilib.
Lənkəran Turizm İnformasiya Mərkəzinin direktoru İlqar Əzimov: “Artıq Mədəniyyət və Turizm Nazirliyi tərəfindən təşkil olunan işçi qruplar tərəfindən yerlərə baxış keçirilib. Astara, Masallı, Lerik və Lənkəran rayonlarının müvafiq yerlərinə. Artıq sənədləşmə gedir.”
İlin sonunadək tamamlanacaq bu layihənin icrası ilk növbədə bölgənin turizminin beynəlxalq səviyyədə tanıtımına xidmət edir. Məqsəd keyfiyyətli turizm xidmətlərinin göstərilməsi, nəzarət mexanizmlərinin gücləndirilməsidir. Eləcədə layihə nəhəng turizm istirahət zonalarının yaradılmasına, eyni zamanda da turizm sahəsi ilə bir başa əlaqəli olan kənd təsərrüfatı və digər sahələrin inkişafına təkan verəcək.
Lənkəran Turizm İnformasiya Mərkəzinin direktoru İlqar Əzimov: “Necə ki, Türkiyədə antalyada turizm rekreasiya bölgəsi yaradılıb və artıq ora sırf turizm zonası kimi tanınır. O cümlədən də Azərbaycanın bir sıra bölgələrində belə turizm rekreasiya zonaları yaradılacaq. Sevindirici haldır ki, Cənub bölgəsi də bu seçimə düşüb.”
Cənub rekreasiya zonasının yaradılması ilə işlərin yekunlaşmayacağını deyən müsahibimiz uzun illər burada kompleks işlər görüləcəyini qeyd edib. Artıq investorların cəlb olunması üçün işlərə başlanılıb. 2018-ci ilin iyul ayında bölgədə Qafqazda ən böyük müalicəvi istirahət zonasının istifadəyə verilməsi bu işlərin davamı olacaq.
