Mən də getdim: İspaniya - Barcelonaya doğru

Barcelona elә şәhәrlәrdәndi ki, qopmaq olmur. Getdikcә getməyin gәlir.
Xəbərlər 19 Fevral 2015 00:00 2698
Mən də getdim: İspaniya - Barcelonaya doğru

Gәldik çıxdıq yaz aylarında olan sәyahәtlәr bölümünә.

Yazın ilk sәyahәtini İspaniyada dәyәrlәndirdik.

Lap әvvәldәn, noyabr ayından biletlәrimizi alıb hazır etmişdik. Tәxminәn 30-40 avro müqabilindә ryanirdәn bilet tapa bildik. Sırf ucuz bilet tapacağıq deyә gecә-gündüz saytlarda yatırdıq. Mәncә 40 avroya sәyahәt edә bilmәk şansını qaçırmadığımız üçün bәxtәvәr idik. Gedişi Barcelonaya alsaq da, dönüşü Madriddәn edәk dedik.

Belәliklә, İspaniyanın hәr iki şәhәrin gәzә bilәcәkdik. Amma, Madrid barәdә mәyus oldum (bu haqqda növbәti postumda yazacağam).

Axmaq professorlarımız dәrs müddәtindә sәyahәtә icazә vermirdi (hamı gedirdi, sadәcә bizim sәyahәtlәrimiz onlara batırdı). ӘCCӘB elәdik, әhh!

Uçuş sәhәr olduğu üçün, mәcbur yenә havalimanında gecәlәmәli olduq (qaldığım şәhәr, yәni, Viterbodan Romaya hәmin saatlarda avtobus vә qatar olmadığı üçün, sәhәr uçuşları olan sәyahәtlәrdә, hәmişә bir gün öncә havalimanına gәlib, burda gecәlәyirdik). Sözün qısası, yenә boynumuzu büküb, havalimanında boş gördüyümüz yerlәrә qonaraq uçuş vaxtın gözlәyәsi olduq.

Çox yaxşı keçәn uçuşdan sonra Barcelonanın El Prat havalimanına endik. Bu ispanları çox sevirәm, o ayrı. Amma, belә simic olduqların bilmirdim. Saatla internet verirlәr. Gördüyüm әn az müddәtli pulsuz internet bu havalimanında idi. Evdәkilәrә yaxşı olduğumu xәbәr etmәk adıyla, çoxdan gözlәdiyim 'I am @Barcelona, El Prat' check-inin edib, havalimanından çıxmaq üçün әsas çıxışı axtarmağa başladıq.

Atatürk havalimanından sonra gördüyüm әn qәşәng vә böyük havalimanı idi El Prat. Avropanın әn böyük havalimanlarından biridi. Şәhәrdәn 13 km uzaqlıqdadı. Çox möhtәşәm dizayna sahib olması bir yana, o qәdәr geniş idi ki, yarım saata çıxışı tapa bildik. Bilmirәm nәdәndi, uşaqlıqda yediyim konfet qoxusunu hiss etdim burda. Xoş qoxularla әhatә olunmuş, gözәl aeroport idi.

Havalimanından çıxıb, atdığım ilk tviti heç unutmaram : 'ay amaaan, elә bil, Mayamidәyәm, nә xoş yerdi' yazmışdım (guya Mayami görmüşәm, axı). Hәqiqәtәn dә, elә bil, Mayaminin hansısa çimәrliyinin kәnarında oturmuşdum. Hәr tәrәf palma ağacları, Atlantik okean sahili, günәşlәnәn insanlar vә sairә. Hava da mükәmmәl idi, yaz ayının ilk ayındaydıq, amma atmosfer elә idi ki, sanki Avqust ayına yenicә qәdәm qoymuşduq.

Әlimizdәki cәdvәlә görә, havalimanından şәhәr mәrkәzinә gedәn avtobusla irәlilәmәli, sonra isә metrodan istifadә etmәli idik. Di gәl ki, o avtobusu heç cürә tapa bilmirdik. Tapsaq da, saxlatdıra bilmirdik, avtobus yaxınlaşır, amma sәrnişin almırdı. Hәlә dә mәnә qaranlıq qalıb ki, niyә avtobus sәrnişin götürmürdü.

Gah sola, gah sağa gedib-gәlmәkdәn tәngnәfәs olmuşduq. Әtrafdakı insanlardan soruşsaq da, yenә heçcür avtobus tapa bilmәmişdik. Nәhayәt, bir ispan cütlük şәhәr mәrkәzinә getdiklәrini vә bizә avtobus barәdә kömәk edәcәklәrini dedi.

Necә oldusa, avtobus gәldi vә sәrnişin aldı. 'Bu nәtәr olur, aaa?' deyә fikirlәşib yola davam etdik.

Avtobusları çox rahatdı, İstanbuldakı metrobuslara oxşayırdı. Rahat, tәmiz vә geniş. Onu da qeyd edim ki, nәqliyyat çox da baha deyildi. Tәbii ki, günlük nәqliyyat kartlarını Barcelona üçün dә mәqsәdәuyğun hesab edirәm.

Uzun yol getdik, ya da mәnә yorğun olduğum üçün elә gәldi. Şәhәr mәrkәzinә çatdıqdan sonra isә metroyla hәrәkәt etmәli idik. Biraz da metro sistemi barәdә mәlumat verim.

Yenә çox rahat vә qarışıq olmayan metro sistemi ilә qarşı-qarşıyaydıq. Şәhәr mәrkәzinә yaşıl zolaqlı L3 vә sarı zolaqlı L4 metro xәtti ilә rahatca çata bilәrsiniz. Ona görә dә, Barcelonada hostel seçәrkәn, yaxınlıqdakı metronun yaşıl zolaqlı xәtt olması sizin üçün avantaj olar (şәhәrә tez çata bilmәk üçün). Hәftәiçi sәhәr saat  5-dәn, axşam saat 1-ә kimi metrodan rahatlıqla istifadә edә bilәrsiniz. Hәftәsonu isә 24 saat metro açıq olur. 3 bilet tipi var : 1) Tәk gedişli bilet (2 avro), 2) Günlük bilet (6 avro), 3) T10 bileti (qiymәtin bilmirәm, bu biletlә 10 müxtәlif zonaya gedә bilәrsiniz). Xәbәrdarlıq edim ki, biletlәri buruşdursanız ya da әzsәniz, yeni bilet alası ola bilәrsiniz. Çünki, biletlәr çox hәsasdı vә çalışmaya bilәr. Çox tәәssüf ki, әlil insanlar üçün yaxşı şәrait yoxdu, bircә lift var, o da hәrdәn işlәyir, hәrdәn yox.

Metronun içәrisidә hәr an musiqiçilәri görә bilәrsiniz. Elә xoş tәәssürat bağışlayır ki, әylәnәrәk yol gedirsәn. Bir dә, ilk dәfә idi ki, metroda aşiq olurdum. İspan oğlanlar, ay aman! Qatarda hamı yaraşıqlı idi.

Bizim dә qalacağımız hostel yaşıl zolaqlı metro xәttinin yaxınlığında idi. Metrodan çıxıb, azca piyada yolun qәt etdikdәn sonra hostelә çatırdıq, çox da uzaqda deyildi, yәni. Әtrafı da kafe vә restoranlardan bol idi.

Amma, ilk gün hosteli axtaranda çox әziyyәt çәkmişdik. Әlimizdәki adreslә yolu heçcür tapa bilmirdik. Әtrafda o ki var dolandıq. Әslindә yaxşı oldu bu, әtrafı kәşf etdik. İspanların çörәk mağazaların gördük (hәr sәhәr burdan alış-veriş edib, sәhәr yemәyi yeyirdik), yaxınlıqda qoca insanların bowlingә oxşar qәribә oyununa tamaşa edib, qeyri-iradi dәstәk vermiş olduq, sәhәr qәhvәsi üçün әla kafelәrlә tanış olduq vә Barcelonanın mәşhur Park Güellinin bizim hostelin yaxınlığında olduğunu bildik.

Elә bunları görüb, hosteli tapdıq, nәhayәt. Adı da yadımda deyil. Ümumiyyәtlә, zәhlәm gedәn, razı qalmadığım hostellәrin adını unuduram. Bu da onlardan biri idi.

İlk gününә 21 avro ödәmişdik. Digәr iki günün qiymәti 1-2 avro daha baha idi. Bu qiymәtә әla xidmәt gözlәyirdik, amma vә lakin içimizdә qaldı (!).

Xarici görünüşü bәr-bәzәkli, içi boş şeylәr olur ha, bax bu hostel elә idi. Lap әvvәldәn danışım.

Demәk yorğun-arğın içәri girәndә, bizi ispan lәhcәsilә ingilis-dilindә danışan qarabuğdayı qız qarşıladı. Doğma-böyümә Barcelonalı imiş vә biz hostelә gәldiyimiz gün onun ikinci iş günü imiş. Aldıqmı başımıza bәlanı?! Normalda qeydiyyat, pul ödәmә, otağı tanıtma filan 20 dәqiqә çәkәr ya çәkmәz. Biz yalan olmasın, azı 1 saat resepşnda qalası olduq. İşi bilmәyәn qızı gәtirib qoyublar resepşna, olan biz yazıq tәlәbәlәrә olur. Qız bilmirdi işlәri nә cür nәzarәtdә saxlasın, arada üzümüzә gülümsәyirdi vә vaxt qazanmaq üçün 'Barcelonanı sevdinizmi? Haralısınız? Neçә gün qalacaqsınız?' tipli suallar verib başımızı qatırdı. Biz dә yalandan üzünә gülәrәk toplu halda sәmimiyyәtsizliyin dibinә vurmuş haldaydıq. Axı yazığıq biz.. Bir gecәni onsuz da Romada, havalimanında keçirmişdik. Sonra ağır yüklә gәzә-gәzә hosteli tapmışdıq. İstәdiyimiz tәk şey tәmiz yataq idi. Qız da bizi hәm bir saat ayaqüstә saxlatdırır vә bu da bәs etmirmiş kimi, bizә tәmiz әdyal, ağ örtük vermirdi. Hәlә etiraz edәndә dә 'hostel әslindә әdyal filan vermәmәlidi' deyib bizә minnәt dә etdi. 'Sәnin başın qaçıb az?!' deyirmişcәsinә üçümüz birdәn üstünә elә hoppandıq ki (!) әlindә olan әn tәmiz әdyal vә ağ örtüklәri axtarmağa getdi. Getdi getmәsinә, amma ütüsüz örtüklәrlә qayıtdı. Heçcür ütülәdә dә bilmәdik örtüklәri. Lәnәt olsun, yorğunluğa artıq tab gәtirә bilmәdiyimizi görәndә otağa çıxmağa qәrar verdik. Hәlәki otağın ilk qonaqları biz idik (sonradan 4-5 brazilyalı qız gәldi).

Çox geniş otaq olmasa da, idarә etmәk olurdu. Heç olmasa, hamam yaxşı vәziyyәtdә idi, o baxımdan şanslıydıq.

Yuxusuzluq vә yorğunluq elә bil, ruhumuzu bәdәnimizdәn çıxarmışdı, nә etdiyimizi, nә dediyimizi anlamaqda çәtinlik çәkirdik. Xülasә, alarm qoyub yatdıq ki, axşam tәrәfi şәhәrә çıxıb gәzәk. O qәdәr yorğun idik ki, elә bil, qırx gün-qırx gecә daş daşımışdıq. Ona görә dә yuxudan oyana bilmәdik ki, bilmәdik. Yatıb qaldıq. Oyananda saat tәxminәn 11-12 radәlәri idi.

Tәrslikdәn aldığımız şirniyyatları da yemişdik vә yuxudan ac halda oyanıb, yemәyә heçnә tapa bilmәdik. Düşündük ki, bәlkә, hosteldәn xahiş etsәk, bizә yemәk üçün nәsә verәrlәr. Amma, ordan da әlimizi üzdük, heç çay vermәdilәr, qaldı ki, yemәk. Hәlә üstәlik 'sәhәr yemәyi olacaq, sәhәri gözlәyin' demәzmi?!

Yaxınlıqda kafe vә ya restoranlardan hansınınsa açıq olub-olmadığının soruşduqda isә, bizә cәhd etmәyimizi söylәdi. Qrupyoldaşımla gecә vaxtı düşdük Barcelona küçәlәrinin canına. Küçәdә bir allahın qulu da yox idi. Tәk-tük gördüyümüz adamlar da evlәrinә doğru gedirdi. Küçәdә bir biz vardıq, bir dә Barcelona küçәlәrini tәmizlәyәn, böyük vә sarı maşınlarda gördüklәri hәr küçәdә dayanıb yeri paraşoklayan (?) tәmizlik işçilәri. O vaxt ilk dәfә idi ki, hansısa şәhәrdә küçәni tәmizlәyәndә, paraşokdan istifadә etdiklәrini gördüm. Küçәlәri ev tәmizlәyirmişlәr kimi tәmizlәyirdilәr. Hәr tәrәf yuyucu maddәlәrә görә gözәl qoxurdu. Yerdә bir çöp belә tapmaq olmurdu, qaldı ki zibil (Barcelonada qaldığım 3 gün әrzindә natәmizlikdәn әsәr-әlamәt görmәdim).

Nәysә, çox haşiyәyә çıxmayaq.

Bircә kafe açıq idi, o da içki verirdi, yemәk yox. Suyumuz süzülә-süzülә hostelә qayıdası olduq. Ac yatmaq nә pis şey imiş aaa, o gün anladım. Özümә söz verdim ki, sәhәr doyana kimi nә gәldi yeyәcәm. Yemәk xәyal edә-edә yuxuya getdim.

Sәhәr hava çox әla idi, günәşin isti şüaları ilә yeni Barcelona gününә gözlәrimi açmışdım. Havanın gözәlliyi aclığımı anlıq unutdurmuşdu mәnә. Amma, qarın dәrdi başqa şeydi dә. Oyanan kimi hazırlaşıb çıxdıq ki, sәhәr qәhvәsi üçün kafeyә gedәk. Yolüstü ispan xalqının sevәrәk aldığı şirniyyatlardan alaq dedik. Heyf hәr yol boyu gördüyümüz bu şirniyyat vә çörәk mağazasının adını unutmuşam. Çox әla işçilәri vә mәhsulları var. Qiymәtlәr dә bombastik idi.

Sәhәr vaxtı sobadan yenicә çıxmış isti şirniyyatlarımızı alıb, kafelәrin birindә qәhvәmizlә birlikdә sәhәr yemәyi yedik.

Yemәk müddәtindә dә ilk gedәcәyimiz yerlәri xәritәdә işarәlәmәyә başlamışdıq. Tam qaldığımız hostelin yanında Park Güell olduğu üçün ilk gedәcәyimiz yer dә elә mәhz ora oldu.

Hardasa, piyada 15-20 dәqiqәlik yol olardı. Bircә çәtin tәrәfi yuxarı doğru uzanıb gedәn pillәkanları qalxmaq idi, bunu bacardınızsa, demәk artıq Park Güelldәsiniz.

Park Güell haqqında öyrәndiklәrimi sizinlә dә paylaşım :

Bu park Barcelona aristokratik tәbәqәsi üçün yaradılmışdı. Parkın içәrisindә, tam mәrkәzindә Gaudinin hazırladığı ilan fiqurlu oturacaqlar var. Sırf bura göz gәzdirmәk istәsәniz, bilet almalısınız. Ancaq parka giriş pulsuzdu.

Parkda olan pillәkanlar Gaudi tәrәfindәn hazırlanıb. Parkın hazırlanmasında istifadә olunan şәkil vә fiqurların hamısı tәbiidi. Ona görә dә ilk görüşdә insana elә tәsir bağışlayır ki, sanki nağıllar alәmindә tәsvir olunan yerlәrdә gәzirsiniz.

Tarixinә gәldikdә isә deyә bilәrәm ki, Eusebi Gaudi adlı sәhmdar Barcelonanın şimalında 17 hektarlıq torpaq sahәsi alır vә gәlәcәkdә burada 60-a yaxın binanın tikilmәsi barәdә planlar qurur. 1900-cu ildә Guell bu proyektlә bağlı Gaudi ilә görüşür vә bundan sonra 1914-cü ilә qәdәr Gaudi burada çalışmağa başlayır. Ancaq, heçnә gözlәnilәn kimi getmir vә tikilәn heçbir ev satılmır. 1918-ci ildә isә әrazi dövlәtin nәzarәti altına keçir vә 1922-ci ildәn bәri Park Güell olaraq insanlara açıq elan edilir.

Elә gözәl yerdә yerlәşib ki, burdan möhtәşәm Atlantik mәnzәrәsinә şahid ola bilәrsiniz. Parka nәzarәt edәnlәr üçün iki ev tikilib. Evlәrin pavilion hissәlәri vә pillәkanlar Gaudinin әl işlәridi.

Parkın içәrisindә bir zamanlar Gaudinin yaşadığı ev var ki, hazırda bu ev Gaudi muzeyi adı altında fәailiyyәt göstәrir. Mütlәq gәlib görmәlisiniz.

Park Güellә gәlmәk üçün Lesseps metro stansiyasında enib (bizim hostelin yaxınlığındakı yaşıl zolaqlı metro xәtti) 300 metr yol qәt etmәlisiniz. Park tәpәdә yerlәşir deyә, keçi kimi yuxarı dırmaşanda, arada deyinә dә bilәrsiniz (mәnim kimi). Hәmçinin 24 nömrәli avtobusdan da istifadә edib Park Güellә gәlә bilәrsiniz. Vә unutmadan, hop on/hop off avtobusları da sizin xidmәtinizdәdir.

Bu arada, onu da qeyd edim ki, әgәr bileti ofisdәn alsanız, 8 avro ödәyәcәksiniz, online alsanız, 7 avro. Әlillәr üçün endirim var vә 6 yaşınadәk olan uşaqlar üçün pulsuzdu.

İndi isә Park Güelldә keçirdiyim gözәl anları sizin nәzәrinizә çatdırım.

Mamamiaaaaa! Hәtta, Ohaaaa! Ya da türklәrin digәr tәәccüb ifadәsi - Yok deve! İçәri girәndә ilk hiss etdiyim, dilimә gәtirdiyim sözlәr bunlar oldu. Ay amaan, nә böyük park imiş!

 

İçәridә immiqrantları gördüm, maqnit satırdılar. Biri 1 avroya. Kolleksiyam üçün әla qiymәt idi, aldım. Siz dә maqnit yığırsınızsa, Barcelonanın hansısa hәdiyyәlik mağazasından almayın, әn ucuzu bu parkda idi.

Parkı dolandım azca, sonra da muzey hissәsinә girdim. Gaudi elә insan olub ki, toxunduğu hәr yeri gözәlliyә qәrq edib. Әl işlәri heyrәtamiz idi. Möhtәşәm!

Bu gözәlliklәri fotoaparatıma qeyd edәn yerdә bir qrup bizә yaxınlaşdı. Mәgәr bizlә şәkil çәkdirmәk istәyirlәrmiş. Elә pozitiv idilәr ki :) Özümüzü popular insanlar kimi hiss etmişdik lap. Amma, heyf o foto әlimdә deyil, çox heyf.

Nәysә. Tәpәdәn möhtәşәm Atlantik mәnzәrәsini seyr edib, aşağı doğru düşdük. Gaudi mağazasına girdik. Möhtәşәm hәdiyyәlik әşyalar satılır. Әla şeylәr aldım (çox baha deyil, siz dә mağazadan nәsә әldә edin, sonra xatirәsi yaxşı olur).

Bir ara skameykalarda uzanıb, Mart ayında özümüzü Barcelonanın isti günәş şüalarına tәslim etdik, günәş vannası qәbul etdik.

Sifәtim bundan razı deyildi, deyәsәn. Pomidor rәngini almışdı.

Burda bir yaşlı dayı ilә rastlaşdıq. Söhbәti o qәdәr maraqlı idi ki, heç gedәsim yox idi parkdan. Demәk, iki universitet bitirib vә professor olub uzun müddәt. Sonra isә müxtәlif daşlardan bujiteriya düzәltmәklә dolanmağa başlayıb.

İspan deyildi, unutmuşam haralı olduğun. O qәdәr gәzib dünyanı, 4-5 dil bilirdi, bәlkә dә çox. Çox mükәmmәl ingiliscәsi vardı. Çox da mәdәni idi.

Düzәltdiyi üzüklәrdәn aldıq, bizә pulsuz boyunbağı hәdiyyә etdi. Әlimi ovuclarına alıb hәr barmağın mәnasını başa saldı mәnә. İndiyә unutmuşam, amma o vaxt dediklәri ilә çox tәsir etmişdi mәnә. Möhtәşәm insandı, çox güman hәlә dә Park Güelldә çalışır, yolunuz düşsә, maraqlı söhbәtinә qoşulmağınızı mәslәhәt bilirәm.

Onunla sağollaşıb Park Güellin piknik bölgәsinә gәldik. Skameykada oturdum vә gitarası ilә hәzin ispan mahnıları ifa edәn cavan oğlanın mahnı sәdaları altında, taxta stol әtrafında sıx birlәşib, maraqla söhbәtlәşәn yaşlıları dinlәmәyә başladım (çox da başa düşürmüşcәsinә).

Dillәri elә gözәl, axıcı vә melodikdi ki, mәncә, dünyanın әn gözәl dilinә sahibdilәr.

Park böyük olduğundan, azı saat yarımınızı buraya sәrf etmәlisiniz.

Biz dә tәxminәn bir saat parkda dolandıq. Günorta vaxtı olduğundan, digәr görülmәli yerlәrә vaxt qalsın deyә yola düşdük.

Gәlib çıxdıq hara? Barcelonanın әn mәşhur küçәsi La Ramblaya (ispan dilindә deyib lovğalanmaq istәsәniz, Les Rambles).

Küçә bildiyiniz bizim Tarqoviy küçәsi tәrzindә olub (biraz oxşayır, yәni), ispanların vә turistlәrin әn çox toplaşdığı mәkandı. Plaça de Catalunya ilә Kolumbun abidәsi olan hissәni bir-birinә bağlayır. Küçәnin sağ vә sol hissәlәri maşın yoludu vә hәr iki tәrәfindә çoxlu restoranlar, kafelәr, gül dükanları, suvenir mağazaları vә sairә görә bilәrsiniz.

Hәmçinin dә, küçә başdan-başa küçә musiqiçilәri, rәqqas vә rәqqasәlәri, rәssamları ilә doludu. Heç sәssiz yer deyil, hәr addımınızda müxtәlif musiqi sәdaları eşidәcәksiniz.

Les Rambles (belә deyәndә özümü havalı hiss edirәm, ehe) әvvәllәr çox böyük olub, sonradan bu hala gәlib. İndilәrdә beş hissәsdәn ibarәtdi. İlk hissәsi Rambla de Canaletes adlanır. Adını Canaletes bulağından alıb. Rәvayәtә görә, buranın suyundan içәn yenә Barcelonaya gәlә bilirmiş (tapsaydıq da, içsәydik).

Qeyd etdiyim kimi әtraf restoranlardan boldu.

Biz dә küçәlәrdә o qәdәr ayaq döydük ki, yorulub aclığa qәrq olduq. Restoranların qiymәtlәri ilә maraqlanaq dedik. Yaxşı ki, restoranların qapı hissәsinә menyuları yerlәşdirirlәr, yoxsa adam içәri girib qiymәtlәri görәndә gözü kәllәsinә çıxmağı bir tәrәfә, utandığından restoranı da tәrk edә dә bilmir vә menyuda olan әn ucuz şeyi tapıb sifariş vermәk üçün, böyük diqqәtlә menyunun hәr sәtrin әzbәrlәmәli olur.

Burdan da başa düşdüyünüz qәdәrilә, bildiniz ki, o tipdә restoranlarda oturası olmadıq. Amma vә lakin bir türk restoranı tapdıq ki, ilahiiiii. Ömrümdә elә dadlı dönәr yemәmişdim. İnanmıram ki, Türkiyәnin özündә elә dadlı dönәr olsun. Sağ olsunlar, qarşımıza çıxan türklәr hәmişә kömәksevәr olub bizә qarşı, burdakılar da bizlә çox yaxşı rәftar elәdilәr.

Elә dә acmışdıq ki, tez yeyib, gecә düşmәdәn Catalunyanı gәzә-gәzә gәlib çıxdıq Kolumbun abidәsi önünә.

Öyrәndiyim qәdәrilә, abidә 1988-ci ildә Barcelonada planlaşdırılan sәrgi üçün hazırlanıb. Kolumb Barcelonaya sәfәr edib axı, tәşәkkür abidәsidi, yәqin.

Başımı arxaya çevirәndә nә görsәm yaxşıdı? Dalinin ev muzeyi! Oydaaa.

Qaça-qaça yolu keçib, muzeyә giriş qapısın axtardıq. Evin dә altı kafedi vә hәmin gün hamı içki qonaqlığında idi, ayıq adam tapmaq mümkünsüz idi.

Tam qapının qarşısında orta yaşlı, sәliqәli geyimdә vә bir xeyli centilmen olan ispan oğlan dayanmışdı. Qapının zәngini bizim üçün vurdu vә bizә deyildi ki, arxa qapıdan içәri girin. Tam gedirdik ki, hәmin o ispan qaqaş söhbәt etmәyә başladı bizlә. Amma, baxışları çox narahatverici idi. Belimdә ağır çanta, ayağımda sport ayaqqabı, әynimdә kurtka (?), saç-baş yaman gündә vә bu qaqaş mәni gözlәri ilә yeyir. Hansı günümә baxırdı axı?! Hәlә әlimi dә sıxdı, gördüm buraxmır, dartışdırıb canımı qurtardım. Nәzakәtsizlik olmasın deyә dә gülümsәyib çox sağ olun dedim, o da ispanca nәsә pıçıldadı.

İlk ispan oğlanla heç dә yaxşı xatirәm olmadı, heyf. Amma, o qәdәr yaraşıqlıdılar ki. Tәsәvvür edin, metro qatarında 10 oğlan varsa, 9-u mütlәq yaraşıqlı olur. Bәxtәvәr bunların qızlarıdı ki, belә cәnnәtdә yaşayırlar.

Nәysә. Muzeyә girmәdik, yolu keçib Port Vell, yәni, Barcelonanın sahilinә getdik.

Әhali burda sıx toplanır. Qaçırlar, velosiped sürürlәr, günәş vannası qәbul edirlәr, yeyirlәr-içirlәr.

Yәni, istirahәt üçün hәr şәrait ver. Atlantik sahillәrindә hәyatdan hәzz alırlar, bir sözlә.

Tam da burda teliferiki gördük. Nә bomba görüntüsü vardı, bir bilsәz. Tәsәvvür edin, teliferiklә tam okeanın üstündәn hәrәkәt edirsiniz. Bir ovuc dolusu adrenalin. Pәh!

Dedik ki, biz dә bu hәzzi dadaq vә teliferiyә doğru yol aldıq. Sahilin tam qarşısında olduğundan, bütün sahili piyada dolanmalı idik. Normal sürәtlә hardasa 40 dәqiqәyә filan çatmalı idik. Yol boyu sahildә ifa edәn musiqiçilәrin mahnı sәdaları altında yolumuza davam edirdik (musiqiçilәr şәhәridi Barcelona. Hәr yerdә mütlәq musiqi sәsi eşitmәk olur). Arada әldәn düşüb, özümüzü yamyaşıl otların üstünә atıb, ispan mahnılarına qulaq asdığımız da oldu. Hamı sahil kәnarında zövq alırdı.

Teliferiyә çatmağımıza az qalmış bir oğlanla qarşılaşdıq. Yaraşıqlı idi, öz dә çox. İtalyan çıxdı dostumuz. İlk görüşdә eşq! (ömrümdә bu qәdәr aşiq olmamışdım, hәr addımda aşiq olurdum vә o qәdәr yaraşıqlı idilәr ki, baxa-baxa gedәndә, başım stolbalara dәyirdi).

Qaqaşın verdiyi pozitiv enerji ilә artıq gәlib ünvana çıxmışdıq. Bilet üçün sıraya düzlәndik vә sıra bizә çatanda dedilәr ki, külәkli hava şәraitinә görә artıq sәrnişin ala bilmirik. Sabah gәlәrsiz deyib, bizi kışkışladılar (!).

Kefimiz tamam öldü, sahilә gedib oturduq. Sәn gәl 40 dәqiqә piyada yol get vә nәticәsi olmasın. Bir dә eyni yolu geriyә qayıtmaq da vardı, axı. Ehh.

Belәnçik geriyә qayıdası olduq. Ayaqlarımız bizi bir parka gәtirdi, oturub dincәldik. Әtraf da parolsuz vayfay qaynayırdı, biz dә fürsәti әldәn vermәdik, tәbii.

Axşam düşmüşdü, hava da get-gedә soyuyurdu. Yәni, hostelә doğru yollandıq.

Sabahsı gün hava külәkli deyildi, elә sevinmişdik ki, teliferik turuna qatılacağıq deyә. Elә birbaşa ora gedәsi olduq.

Düşündüyümüz kimi oldu, teliferik çalışırdı.

Sәhәr 11-dә işә başlayırlar. Bir gedişi 11 avrodu, gediş-dönüş isә 16.50. Biz tәk gedişli seçdik, çünki teliferik sizi Barcelonanın tәpәlәrindәn birinә aparır vә mәncә, ora da gәzmәli vә görmәli yerlәrdәndi. Piyada asanlıqla şәhәrә enә bilәrsiniz. Amma, siz yenidәn okean üzәrindәn tur atmaq istәsәniz, әlinizi cibinizә salarsınız :)

O qәdәr adam vardı ki, 7-8 nәfәr birdәn liftә girirdi vә uzun müddәt sırasın gözlәmәli olurdu. Bu qüllәdәn Barcelona möhtәşәm görünürdü.

Sıra nәhayәt bizә dә gәlmişdi. Әksәriyyәti çinli vә yapon olan turistlәrlә teliferiyә minib yavaşca irәrilәmәyә başladıq.

Möhtәşәm mәnzәrәyә şahid olurduq. O zaman anladım ki, hәqiqәtәn dә Barcelona әsrarәngiz şәhәrdi. Aşağıda qarışqa kimi qaynayan insanlar, mavi okean vә yaşıl ağaclar çox hәmahәng görünürdü. Arada başımı pәncәrәdәn çıxardıb tәrtәmiz havanı içimә çәkirdim, külәk saçlarımı elә gözәl dalğalandırırdı ki :) Enmәk istәmirdim heç yerә.

Tәxminәn 15 dәqiqәyә artıq tәpәyә çatmışdıq.

Tәpәnin tam başında bahalı balıq restoranı var. Balıq sevәnlәr üçün yaxşı mәkandı.

Tәpәdәn dә әla Barcelona mәnzәrәsini seyr etmәk olur. Bir dә tәpә başdan-ayağa geniş parkdı. Әla istirahәt vә piknik bölgәsidi, yәni.

Tәpәni dolanıb, aşağı doğru enmәyә başladıq. Cәld tәrpәnib metroya çatdıq ki, Barcelonanın Camp Nou stadionuna vaxtında çata bilәk.

Ola bilәr ki, sizә ofsaydı başa sala bilmәyim, amma o stadiona getmәk mәnim әn böyük arzularımdan biri idi. Barcelonaya aid olan hәrşey dәyәrli olduğu kimi, Camp Nou da çox dәyәrlidi mәnә.

Şәhәrin hәr yerinә çatmaq metro ilә çox asan olduğu kimi, stadiona da çatmaq çox vaxt tәlәb etmәdi.

Bilet satılan ofisin qarşısı insan qaynayırdı. Kiçiyindәn yaşlısına hamı ofisin qarşısına toplanmışdı. Qiymәtlә maraqlandıq, 21 avro dedilәr. Çox baha gәldi, amma, içәri girәcәkdim onsuz. Tam ofisә yaxınlaşırdım ki, tәlәbәlәrә 17 avro yazısın görüb bir xeylax sevindim. Biletlәrimizi alıb içәri daxil olduq.

Stadion vә muzeyi haqqında nә danışım bilmirәm. Bir sözlә, möhtәşәm idi. İnsanın arzusunun reallaşması uçurdur adamı. O da uçduğum anlardan biri idi.

Camp Nou haqqında danışılası çox şey var, amma mәn sizә orda görüb çәkdiyim bir neçә fotonu tәqdim edirәm ki, nә dәrәcә möhtәşәm olduğuna şahid olasınız. Hәm dә Barcelonalı oxuyucularıma maraqlı olar, virtual gәzinti kimi :)

Klubun rәsmi mağazası da burada fәaliyyәt göstәrir. Hәrşey orjinal olduğundan, qiymәtlәr әl yandırırdı (Real Madridin mağazasın görәnә kimi belә düşünürdüm).

Burdan çıxıb Barcelona kilsәsinә doğru yollandıq.

Bilmirәm niyә, kilsәlәrin xarici görünüşü daha gözәl olur, nәinki içi. Bu da bildiyiniz kilsәlәrdәn idi.

Barcelonada peşman olduğum yeganә şey Sagrada Di Familia kilsәsinә gedә bilmәmәyim oldu. Çox, ama çox peşmanam. Elә pis ürәyimdә qalıb ki. Düşmanıma da arzulamıram belә peşmanlığı. Siz Barcelonaya ayaq basdığınız an bura gәlin, çünki tәk-tük möhtәşәm tikililәrdәndi.

İndi dә hosteldәn çıxdığımız günü anlatım. Dәhşәt idi.

Demәk, onsuz da çox pul verib, normal servis görmәmişdik. Bununla bağlı әsәbiydik, amma nәzakәtsizlik olmasın deyә heşzat demәdik, gәrәk yumardım gözümü, açardım ağzımı. Hosteldәn çıxdığımız gün resepşnda başqa qız vardı. Açarı tәhvil verib, depozit pulumuzu almalı idik. Bir dә nә eşitsәk yaxşıdı? İlk gün resepşnda olan qız (lәnәt olası qız) deyibmiş ki, guyamış biz depozit pulun vermәmişik. Qarşısında kalkulyator olmasına baxmayaraq, hәtta verdiyimiz pulu onunla da hesablaya bilmәyib. Utanmazcasına vә hәtta abırsızcasına bizim depozit vermәdiyimizi deyib. Hәtta, resepşndakı qız әlavә etdi ki, guyamış biz ilk gәldiyimiz gün aramızda azәrbaycanca qız haqqında danışıb, onu dolamışıq. Dolamamışdım, amma kaş edәrdim, içim soyuyardı. O qәdәr әsәblәşmişdim ki, ağzımdan çıxanı dedim. Әslindә, resepşnda olan ikinci qızın günahı yox idi, amma әsәbdәn ona partlamışdım. Rәfiqәlәrim pulu almadan gedәk desәlәr dә, o pulu sökә-sökә aldım, prinsipә düşmüşdüm dә.

O qәdәr әsәblәşmişdim ki, acmağa başladım. La Rambla küçәsindә әla qiymәtlәrә milli ispan mәtbәxindәn yemәklәr verirlәr, әn mәşhurları da paella vә tapasdı. Onun dadına baxmağa getdik.

İkisi dә әntiqә idi. Adamın paella bişirә bilәn sevgilisi ola, hәftәdә üç dәfә yeyәsәn (ÜNVANLI).

Bizdә xәngәldi, ispanlarda paella. Düyüdü vә içәrisindә cürbәcür dәniz mәhsulları. Dәniz mәhsullarından bol ölkәdi deyә yemәklәrdә çox istifadә edirlәr. Tapas da dәniz mәhsulları vә tәrәvәzlәrlә hazırlanmış yemәkdi.

Soyuq servis edilir, salat әvәzidi. Ömrümdә ilk dәfә idi ki, әvvәllәr iyrәnc dediyim dәniz mәhsullarını lәzzәtlә yeyirdim.

Axşamüstü burda şam yemәyin yeyib Madridә getmәk üçün avtobus terminalına yollanmalı idik. Avtobus da gecә hәrәkәt edirdi deyә vaxtımız bol idi.

Metro ilә birbaşa avtobus terminalına getmәk mümkündü.

Nәysә, metroya girdik. Mәn ayaqüstә qatarın gәlәcәyi yerdә dayandım, rәfiqәlәrim isә mәndәn arxada oturmuşdu. Qatar gәldi, mәn dә normal olaraq, arxaya çevrilib qızlara xәbәr etmәk istәdim. Bir dә nә görsәm yaxşıdı? Qızlar yoxdu. Yoxdu da, yoxdu. Bәlkә, qatara giriblәr deyә düşünәrәk, içәri girib qatara göz gәzdirirdim ki, qatarın qapıları bağlandı vә qatar hәrәkәtә keçdi. Qaldım tәmtәk. Әlimdә dә xәritә yox, telefonum sönüb, bircә bilirәm ki, terminala getmәliyәm.

İspan xalqı da çox kömәksevәrdi axı, sağ olsunlar mәnә getmәli olduğum stansiyanın adın dedilәr. Rahatca terminala çatdım. Amma, qızları görmәdim. Oturdum avtobusların dayandığı yerdә. Gözlәdim, gözlәdim, gәlәn olmadı. Soyuq da bir tәrәfdәn, üşümüşdüm deyә içәri girim dedim. Bir dә görürәm ki, iki qız o yan-bu yana qaçır hәyәcanla. Bildim ki, mәni axtarırlar. Mәni görәndә ürәklәri yerinә gәldi. Mәn elә bilirәm onlar mәni atıb gedib, onlar da elә bilir, eynisin mәn etmişәm onlara. Söhbәt tamam başqa cür olub. Mәn qatarı gözlәyәndә, qızlardan biri sәhv stansiyada olduğumuzu deyib. Mәnә dә xәbәr ediblәr, amma xәbәrdarlıq etdiklәri an qatar gәlib vә qatarın sәsindәn eşitmәmişәm. Belәcә ayrı düşmüş olduq.

Yaxşı ki, avtobusun vaxtına gәlib çata bilmişdim.

Gecә avtobusu ilә Madridә doğru yollandıq.

Barcelona macәraları da, belәliklә bitdi. Amma, yenә gedәcәm. Barcelona elә şәhәrlәrdәndi ki, qopmaq olmur. Getdikcә getməyin gәlir.

Müəllif: Nura Dünyamalıyeva

OXŞAR XƏBƏRLƏR