AZAL və KPMG “Open Skies” layihəsini müzakirə ediblər

AZAL və KPMG “Open Skies” layihəsini müzakirə ediblər
Xəbərlər 6 Noyabr 2018 16:56 36
AZAL və KPMG “Open Skies” layihəsini müzakirə ediblər

“AZAL”ın prezidenti Cahangir Əsgərov 6 noyabr tarixində  KPMG Azerbaijan şirkətinin nümayəndələri - baş menecerlər Fərid Baxşıyev və Andrey İvanovla görüşüb.

"Azərbaycan Hava Yolları" QSC-nin mətbuat xidmətindən daxil olmuş məlumata görə, danışıqların əsas mövzusu Azərbaycan və Avropa arasında "Open Skies" müqaviləsinin təfərrüatları olmuşdur. Azərbaycan hökumətinin sifarişi ilə KPMG şirkəti bu layihə üzrə məsləhətçi rolunda çıxış edir.

Cahangir Əsgərovun sözlərinə görə, belə bir fikir mövcuddur ki, guya AZAL Avropa ilə “Open Skies” müqaviləsinin  imzalanmasının nəticələrindən ehtiyatlanır. "Mən rəsmən bəyan edirəm ki, hər hansı aviaşirkət üçün Azərbaycana reyslərin yerinə yetirilməsi ilə bağlı heç bir məhdudiyyət yoxdur.  Hətta vurğulamaq istərdim ki, xarici daşıyıcılara hava məkanı azadlığı ilə bağlı geniş kommersiya hüquqları verilir " deyə “AZAL”ın prezidenti bildirmişdir.

Xüsusilə qeyd etmək lazımdır ki, Azərbaycan azsaylı ölkələrdən biridir ki,  xarici aviaşirkətlərə beşinci (Bakıdan keçərək tranzit), hətta ən yüksək səkkizinci (ölkə daxilində reyslər yerinə yetirmək hüququ) hava sərbəstliyi hüququ verir.

“Bir daha vurğulamaq istərdim ki, Azərbaycanın hava limanları bütün aviaşirkətlər üçün açıqdır, biz hava daşımaları bazarımızdakı bütün yeni aviadaşıyıcıları salamlayırıq" - deyə Cahangir Əsgərov əlavə etdi.

KPMG şirkətinin baş meneceri Fərid Baxşıyevin sözlərinə görə, "Open Skies" müqaviləsinin aviasiya sənayesinə təsirinin müəyyənləşdirilməsi üzrə beynəlxalq təcrübənin geniş təhlili aparılmışdır, bu layihənin mümkün nəticələrinin  yumşaldılması üçün təlimatlar, habelə yol xəritəsi hazırlanmışdır.

Onun sözlərinə görə, bu gün AZAL aviaşirkəti innovasiya, texnologiya və beynəlxalq standartların tətbiqi sahəsində böyük nailiyyətlər əldə etmişdir  və mülki aviasiya Azərbaycanın qeyri-neft sektorunun əsas seqmentlərindən biri sayılır.

Həmçinin qeyd olunmuşdur ki, "Open Skies" müqaviləsinin imzalanmaya hərtərəfli hazırlanması və ratifikasiya olunması üçün Avropa ölkələrinə 10 ilə yaxın müddət lazım olmuşdur.

Danışıqların yekunlarına əsasən Tərəflər KPMG şirkəti tərəfindən hazırlanmış yol xəritəsinin tətbiqi üzərində birgə fəaliyyəti davam etdirmək barədə razılığa gəlmişlər. Həmçinin risk menecmenti, investisiya strategiyası, müəssisələrin kapitallaşdırılmasının qiymətləndirilməsi sahəsində KPMG şirkəti ilə əməkdaşlıq imkanları nəzərdən keçirilmişdir.

Qeyd edək ki, hazırda Heydər Əliyev Beynəlxalq Aeroportu 50-dən çox istiqamət üzrə 30-dan artıq aviaşirkətə xidmət göstərir. 2018-ci ilin doqquz ayı ərzində paytaxtın hava limanı  3,49 milyon sərnişinə  xidmət göstərmişdir (ötən ilin analoji göstəricisindən 10% çoxdur).  Yeni  reyslərin açılması nəzərə alınmaqla 2020-ci ilin yekunları üzrə bu göstəricinin ildə 7 milyon sərnişinədək yüksəldilməsi prioritet vəzifələrdən biridir.

KPMG  audit və konsaltinq sahəsində peşəkar xidmətlər göstərən və “Böyük Dördlüy”ə daxil olan dünyanın ən böyük şəbəkələrindən biridir. KPMG-nin 155 ölkədə nümayəndəlikləri mövcuddur və 150 mindən çox əməkdaşı vardır.

OXŞAR XƏBƏRLƏR