Qəbələ: otellər, qiymətlər, görməli yerlər - Fotolar

Təbii ki, ilk olaraq sizi hara, hansı nəqliyyat növü ilə getmək, orada hansı görməli yerləri gəzmək və  bu səyahətinizin neçəyə başa gələcəyi maraqlandırır. Elə isə bu yazımızı nəzərdən qaçırmayın.

 

Seyyah.az-ın məlumatına görə, Gün.Az turizm bələdçisi olacaq silsilə yazılara başlayır. Bu yazılarda Azərbaycanın bölgələrinə səyahət etmək istəyənlərə qiymətdən tutmuş görməli yerlərə qədər maraqlı olan hər şey qeyd olunacaq.

 

Beləliklə,  ilk yazı Qafqazın incisi adlandırılan Qəbələyə həsr olunub. Təmiz dağ havasını udmaq, mineral bulaqlardan buz kimi su içmək, Nohurgölün gözəl mənzərəsində şəkillər çəkdirmək, gölün kənarında dadlı çay içmək, qayığa minmək, Qafqaz Albaniyasının qalıqları və onlarca digər tarixi abidələri ilə şöhrət tapmış tarixi yerləri görmək, yeni yaradılmış istirahət komplekslərində dincəlmək istəyirsinizsə, bura baş çəkin. Qəbələ Azərbaycanın gözoxşayan yerlərindəndir. Səyahət edənlərin əksəriyyəti bura heyrandır.

 

 

Qəbələ Bakıdan 225 km məsafədə yerləşir. Bura istirahətə getmək üçün həm şəxsi avtomobildən, həm taksidən, həm avtobusdan, həm də təyyarədən istifadə etmək mümkündür. Bakıdan-Qəbələyə avtomobillə təxminən 4 saat yol qət etmək lazımdır.

 

Avtobusla səyahət etmək istəyənlər üçün isə Bakı-Qəbələ, Gəncə-Qəbələ, Mingəçevir-Qəbələ, Sumqayıt-Qəbələ, Zaqatala-Qəbələ avtobus marşrutları mövcuddur.

 

Avtobuslar Bakıdan-Qəbələyə hər gün Bakı Beynəlxalq Avtovağzalından səhər saat 7:00-dan axşam 18:00- dək yola düşür. Avtobusda bir yerin qiyməti isə 6 manat təşkil edir.

 

Yolda vaxt itirmək istəməyib, mənzil başına daha tez çatmaq istəyənlər isə bir az çox pul xərcləyərək Bakı-Qəbələ aviareysindən istifadə edə bilərlər. Təyyarə reysi həftədə iki dəfə - cümə və bazar günləri yerinə yetirilir.  Cümə günü təyyarə Bakıdan 17:20-də uçur, axşam 20-də isə Bakıya qayıdır. Bazar günü isə 20:30-dan Bakıdan uçur 10:15-da isə qayıdır. Biletin qiyməti isə gediş-dönüş 60 manat təşkil edir. Uçuş Embraer 190 təyyarəsi ilə yerinə yetirilir. Uçuş müddəti 55 dəqiqədir.

 

Qəbələyə səyahət etmək istəyənlər üçün müxtəlif turizm şirkətləri bir günlük səyahət paketləri də təklif edirlər.

 

 

Qəbələdə turist-istirahət komplekslərinin sayı sürətlə artmaqdadır.

 

Burada fərdi evlərdən, koteclərdən tutmuş ən yüksək xidmət təklif edən beşulduz otellərə qədər gecələmək mümkündür. Buradakı məşhur otellərdə bir gecəlik qiymətlər 40 manatdan 100 manatadək dəyişir. Bu qiymətə səhər yeməyi, hovuz, əyləncə məkanlarından istifadə də daxildir. Burada iki və üçulduz otellərdə isə daha ucuz qiymətlər təklif edilir.

 

Özəl evlərdə qalmaq isə qidasız bir nəfər üçün təxminən günü 20 manata təklif olunur.

 

 

Qəbələ Azərbaycanın İsveçrəsi də adlanır. Gözəl təbiəti ilə yanaşı burada qədim və müasirliyin harmoniyası öz əksini tapır. Təxminən 1800 ildən çox mövcud olan Qəbələ şəhəri 600 il ərzində Qafqaz Albaniyasının paytaxtı olub.

 

Qafqaz Albaniyası olmasa da, Qəbələ bu mədəniyyəti indi də yaşadır. Qədim Qəbələnin xarabalıqları rayon mərkəzindən 15 km məsafədə, Qaraçay və Covurlu çayının arasındakı ərazidə yerləşir. Qədim şəhərin daş kitabələri və qalıqlarından ibarət eksponatları isə Qəbələ tarix diyarşünaslıq muzeyində qorunub saxlanılır.

 

 

Təbiət sevənlər  Qəbələdə Nohur gölünə gedib qayıqda gəzə, gözəl mənzərədə şəkil çəkdirə, yaxud da balıq tuta bilərlər. Nohur göl Qəbələ şəhərindən 3 km şərqdə, Nohurqışlaq kəndindən 1 km şimalda, Güllüburun, Göydağ və Yumuru dağların arasındakı təbii çuxurda, dəniz səviyyəsindən 700 m hündürlükdə yerləşir.

 

Nohur gölü  1949-cu ilə kimi təbii göl  olub. 1949-cu ildə bu gölün cənub hissəsində - Güllü burun dağı ilə Yumuru dağ arasında torpaq bənd çəkilərək su anbarı yaradılıb.

 

Nohurqışlaq su anbarına Dəmiraparan və Vəndam çaylarının suyu axıdılır. Nohurqışlaq su anbarından göl balıqçılarının (akvakultura) və idmanın (avarçəkmə) inkişaf etdirməsi baxımından da əhəmiyyəti böyükdür. Hazırda su anbarının şimal, cənubi qərb və şərq sahillərində istirahət zonaları fəaliyyət göstərir.

 

 

Qəbələnin füsunkar gözəlliklərindən biri də “Yeddi gözəl” şəlaləsidir. Şəlalə Vəndam qəsəbəsindən  dörd kilometr məsafədə, dağın dibində, sıx meşəsi olan dağlıq ərazidə yerləşir.

 

Burada yeddi şəlalə olmasa da yeddi pilləkən var və bu pilləkənlərlə dağa çıxmaq olar. Şəlaləyə baxmağa hər il minlərlə turist gəlir.

 

 

Qəbələ təkcə təbiətin möcüzəsi deyil, həm də insanın yaratdığı möcüzə ilə yadda qalır.  Azərbaycanın ən tanınmış əyləncə parklarından biri –Qəbələnd burada yerləşir. Burada uşaqlar və böyüklər üçün qurulmuş parlaq attraksionlar mövcuddur.  Qəbələndə giriş iki manatdır, burada attraksionların qiyməti isə növündən asılı olaraq 1 manatdan 5 manatadək dəyişir.

 

 

Qəbələ təkcə yay istirahət yeri deyil, bura qış turizmini sevənlər üçün də heyrətamiz yerdir. Burada “Tufan” Dağ-Xizək Yay-Qış İstirahət Kompleksi yaradılıb. Kompleks şəhərdən təxminən 4 kilometr aralıda yerləşir. Kompleksin birinci mərhələsi 2014-cü ilin yanvar ayında Azərbaycan Prezidenti İlham Əliyevin iştirakı ilə açılıb.

 

“Tufandağ” Qış-Yay Turizm İstirahət Kompleksinin məqsədi il boyu dağ turizmini inkişaf etdirmək, yerli və xarici turistlərin yüksək səviyyəli istirahətini təmin etməkdir. Kompleks turistlərə ilboyu kanat gəzintisi, qış mövsümündə müxtəlif mürəkkəblik səviyyəli yollarda xizəklə sürüşməyi, xizəklə sürüşmə təlimi, xizəkçilik məktəbi və digər xidmətləri təklif edir.

 

Burada gecələmək istəyənlər üçün isə Kompleks ərazisində Qafqaz Tufandag Mountain Resort Hotel fəaliyyət göstərir və burada bir gecəlik qiymət 190 manat təşkil edir.

 

Kompleksdə kanat yollarında gəzinti 6 yaşadək olanlar üçün pulsuz, 6 yaşdan yuxarı olanlar üçün isə 10 manat təşkil edir.  Xizək yollarında sürüşmək üçün lazım olan geyimlər yarım gün üçün 10 manat,  bir gün üçün 15 manat, iki gün 25 manat, üç gün 30 manata təqdim olunur.

 

Qəbələnin turizm marşrutları adlarını çəkdiklərimizlə yekunlaşmır.

 

Qəbələyə olarkən Udin mədəniyyəti və kulinariyası ilə tanış olmaq üçün Nic qəsəbəsinə, Qəbələnin Laza kəndində, Dəmiraparan çayının başlanğıcında yerləşən Azərbaycanın ən hündür şəlaləsi Muçux şəlaləsinə də baş çəkməyi unutmayın.

 

Tanınmış səyyah, telejurnalist, Azər Qərib də Qəbələnin gözəlliyinə heyran olanlardandır:

 

“Bura mənim üçün doğma yerdir, doğma diyardır. Bakıda anadan olsam da, Qəbələni vətən sayıram.

Turistlər adətən səyahət edərkən həm gözəl mənzərəli, həm də dincəlməyə şəraiti olan yer axtarırlar. Bu baxımdan Qəbələ çox gözəl bir yerdir.  Burada həm dincəlmək, həm dünyagörüşü artırmaq, həm də Azərbaycanın tarixini öyrənmək olar. Bilirsiniz ki, Qəbələ qədim Qafqaz Albaniyasının paytaxtı olub”.

 

Azər Qərib buranı gecələmək üçün də əlverişli hesab edir: “Qəbələdə çox gözəl otellər var. Hərçənd deyirlər ki, ancaq  5 ulduzlu otellər var. Amma Qəbələdə hazırda  iki, üç, dörd ulduz otellər də var. Yəni gecəsi 50 manata da qalmaq olar, daha baha qiymətə də”.

 

O, qısa yolun, nəqliyyat vasitələrinin, hətta təyyarənin olması baxımından da Qəbələnin səyahət üçün sərfəli yer olduğunu qeyd edib.

 

Beləcə, biz qısaca Qəbələ ilə bağlı marağınıza səbəb olacağını düşündüyümüz məlumatları verdik. Hansı nəqliyyat növü ilə gedəcəyiniz, hansı yerlərdə gecələyəcəyiniz isə sizin seçiminizə qalır.

 

Hər birinizə xoş istirahətlər arzulayırıq.